iGovPortal.ch

Digital Economy Awards 2019

L'uniun iGovPortal.ch è vegnida distinguida en il rom dal Digital Economy Awards

Questa gievgia han ils represchentants da l'uniun survegnì a Turitg en preschientscha dal cusseglier federal Guy Parmelin ina bella renconuschientscha per lur sforzs a favur da la transfurmaziun digitala. L'uniun ch'era selecziunada tranter ils quatter finalists n'ha betg pudì prender a chasa il premi principal, ma ha pudì sa consolar d'esser stada fitg damanaivel da quel, sco quai che ha communitgà la giuria. Questa selecziun recumpensa l'emprima emprova interchantunala d'introducir l'e-government cun agid d'ina plattafurma da spurtegl virtuala.    

L'uniun iGovPortal.ch, fundada il 2017 dals chantuns da Friburg e dal Giura e dapi il 2019 era represchentada dal chantun da Soloturn, concentrescha sias forzas cun la finamira da porscher in'organisaziun efficazia sco er ina plattafurma moderna e communabla. Grazia als servetschs da basa integrads sco il pajament online, la controlla d'autenticitad, il scannadi da documents e la suttascripziun electronica era via smartphone, permetta questa plattafurma a las burgaisas ed als burgais sco er a las interpresas da far transacziuns cumplettamain digitalas cun il stadi.

L'uniun iGovPortal.ch è averta a tut ils chantuns svizzers e permetta da concentrar ils custs per sviluppar l'e-government. Ella n'ha nagin intent da rendita e stat er a disposiziun a las citads e vischnancas. Ultra da quai profitescha mintga chantun commember da las investiziuns ed experientschas dals auters e po uschia reducir ils custs da realisaziun. 

Ina soluziun flexibla, segira e communabla che stat a disposiziun a passa in milliun persunas – quai ha persvadì la giuria dal Digital Economy Award. Cun selecziunar ella tranter ils finalists da la categoria «Digital Transformation» ha la giuria era renconuschì la gronda lavur realisada, la flexibladad dal product e la dinamica da l'uniun.

foto Da sanester a guliv : Matthieu Overney, David De Groote, Matthieu Lachat, Stéphane Schwab, William Périat