Ils 23 d'october 2017 han il chantun Giura ed il chantun da Friburg fundà a Delemunt l'emprima uniun naziunala en il sectur da l'e-government. Ella ha num iGovPortal.ch.
Per l'emprima giada han dus chantuns decis dad unir lur forzas en l'entir sectur da l'e-government per metter a disposiziun in'organisaziun effizienta ed ina plattafurma interchantunala moderna e communabla. L'uniun iGovPortal.ch ch'è averta a tut ils chantuns da la Svizra ha la finamira che tut ils commembers da l'uniun possian profitar dals custs da svilup dals chantuns e da las vischnancas en il sectur da l'e-government. L'uniun na vul betg far gudogn. Mintga chantun commember profitescha da las investiziuns e da las experientschas da l'auter e reducescha uschia ses custs d'implementaziun.
Il fatg che la plattafurma appartegna als chantuns è in trumf per la controlla da custs a lunga vista. Ils chantuns commembers èn represchentads tant en la radunanza sco er en il gremi directv ed en il gremi tecnic. Quai permetta da garantir il svilup tecnologic ed ils ulteriurs svilups ch'èn necessaris per l'integraziun da las prestaziuns da l'e-government. Tenor las statutas pon las vischnancas sin dumonda a lur administraziun chantunala medemamain utilisar la plattafurma da tecnologia ed uschia realisar respargns da scala considerabels.
L'uniun sa legra da proximamain pudair beneventar novs chantuns. Ils basegns en il sectur da l'e-government èn evidents en l'entira Svizra e numerus contacts èn gia vegnids stabilids. Questa uniun vegn ad avair in effect positiv sin las iniziativas communablas e dar schlantsch a la dersaziun da l'e-government, uschia che las burgaisas ed ils burgais da la Svizra pon profitar prest da prestaziuns armonisadas. La strategia da l'uniun sa basa sin partenadis public-privats che sustegnan il svilup da la structura economica en il sectur digital.