Ils 31 mars 2022 ha la radunanza generala da l'uniun iGovPortal.ch acceptà il chantun da Lucerna unanimamain sco nov commember. Lucerna sa participescha ensemen cun ils chantuns da Friburg, Giura, Grischun, da Son Gagl e da Soloturn a l'ulteriur svilup da la plattafurma communabla dad e-government che colliescha las burgaisas ed ils burgais cun lur administraziun.
Cun l'adesiun a l'uniun conferma il chantun da Lucerna ch'el è persvadì dal potenzial dal spurtegl virtual segir iGovPortal. El demussa era sia prontezza da collavurar activamain cun ils auters chantuns che utiliseschan gia la plattafurma e da concentrar las resursas.
La participaziun da Lucerna augmenta il potenzial dals access a la plattafurma dad e-government interchantunala sin 2.1 milliuns burgaisas e burgais, pia sin 24% da la populaziun.
